काठमाडौं, १६ जेठ । निजामती कर्मचारीहरुको आधिकारिक ट्रेड युनियनको यही जेठ १९ गते हुन गइरहेको निर्वाचनमा डा. बाबुराम भट्टराईको नयाँ शक्ति नेपाल निकट निजामती ट्रेड युनियन नेपालले कांग्रेस निकट नेपाल निजामती कर्मचारी युनियन (संघ)लाई समर्थन गरेको छ ।
आइतबार निजामती ट्रेड युनियन नेपालका अध्यक्ष शोभाकान्त नेपाल र निजामती कर्मचारी युनियन(संघ)का अध्यक्ष सुवोधकुमार देवकोटाले संयुक्त विज्ञप्ति जारी गर्दै चुनावमा युनियन (संघ)लाई सहयोग गर्ने प्रतिवद्धता जनाएका हुन् ।
चुनावको तयारी अन्तिम चरणमा पुगेका बेला दुई संगठनबीचको चुनावी एकताले नेपाल निजामती कर्मचारी युनियन(संघ)को पल्ला भारी भएको युनियन(संघ) ट्रेड युनियन निर्वाचन परिचालन समिति सदस्य विश्ववन्धु रेग्मीले जानकारी दिए ।
नेपालको निजामती सेवाको इतिहासमा पहिलो पटक जेठ १९ गते चुनाव हुन लागेको हो । चुनावले निजामती कर्मचारीहरुको पेशागत मर्यादा, कर्मचारी एकता, सेवा सर्त, वृत्ति विकास एवं सेवा सुरक्षा लगायतका यावत विषयमा सुधार गर्ने अपेक्षा गरिएको छ ।
युनियन नेपाल र युनियन (संघ)द्वारा जारी गरिएको विज्ञप्तिमा भनिएको छ– ‘आम नागरिकहरुप्रति राष्ट्र सेवक कर्मचारीहले जनताप्रति निर्वाह गर्नुपर्ने भूमिका निष्पक्ष र तटस्थ गराउन आधिकारिक ट्रेड युनियनको निर्वाचन विधि सम्मत, अनुशासित र समझदारीपूर्ण ढंगले सौहार्दपूर्ण वातावरणमा चुनावी अभियानमा भई नेपाल निजामती कर्मचारी युनियन (संघ)लाई पहिलो स्थानमा विजयी गराउन अपिल गर्दछौं ।’
dainiknepal
No comments:
Post a Comment